5. Մշակույթներ և սերունդներ

Տեխնոլոգիայի զարգացման փուլերը, հասարակական իրադարձությունները, ճգնաժամերը ազդում են սերունդների դաստիարակության և աշխարհայացքի վրա։ Հայաստանում սերունդները կարելի է տարբերակել այսպես. խորհրդային տարիների, Արցախյան առաջին պատերազմի ու «մութուցուրտ» տարիների, անկախության, «հեղափոխության» և այլն։

Դիտարկենք աշխարհում ընդունված և առավել ընդգծված տարբերություններ ունեցող մի քանի սերունդ։

Բեյբի բումերներ (Baby Boomers). Երկրորդ համաշխարհային պատերազմից հետո ծնված սերունդ, որն անունը ստացել է ծնելիության զգալի աճի շնորհիվ։ Այս սերունդը տեսել է բախումներ, Սառը պատերազմ, տնտեսական բարգավաճում, քաղաքացիական շարժումներ, պատմական խոշոր իրադարձություններ։

X սերունդ (Gen X). 1965-1980 թթ. ծնված սերունդ։ Նրանց հաճախ անվանում են հնարամիտ ու թերահավատ, որովհետև տեսել են պետական և մասնավոր խոշոր կառույցների ճգնաժամեր, հաղթահարել դրանք։ Նրանք նաև տեխնոլոգիաների արագ աճի, օրինակ, անհատական համակարգիչների ծնունդի ու գործածության ականատեսն են։

Y սերունդ (Millenials, Y Gen). 1981-1996 թթ. ծնվածներ։ Միլենիալներն արդեն համարվում են թվային բնիկներ, որոնք օգտագործել են համացանցը, թվային զարգացած տեխնոլոգիաները։ Նրանք հակված են ամեն գնով բարձրագույն կրթություն ստանալ, հաղթահարել տնտեսական մարտահրավերներ, բայց նրանք տեսել են նաև ահաբեկչական խոշոր հարձակումներ և 2008 թ.-ի ֆինանսական ճգնաժամը:

Z սերունդ (Gen Z). 1997-2012թթ. ծնվածներ, որոնք ամբողջովին մեծացել են թվային դարաշրջանում: Տիրապետում են տեխնոլոգիային, բազմամշակութային են, ուզում են սոցիալապես և քաղաքականապես ավելի տեղեկացված լինել, ունենալ սեփական գործ։ Ականատես են սմարթֆոնների և սոցիալական մեդիաների տարածմանը, մեդիա դաշտի արագ փոփոխություններին։