6. Թվային հետք

Թվային աշխարհում յուրաքանչյուր թերթում (scrol), սեղմում (click), գրառում թողնում է իր հետքը: Այս «ոտնահետքերը» երկարատև ազդեցություն են ունենում անձի ինքնության և առցանց հեղինակության վրա:

Օրինակ, մանուկ տարիների կիսամերկ կամ մերկ լուսանկարները, որոնցով կիսվել են ծնողները, քաղաքական գրառումը, որը հրապարակվել է տարիներ առաջ՝ նշանակալի ազդեցություն կարող են ունենալ որոշ ժամանակ հետո։

Մեր որոնումների պատմությունը, տաքսի ծառայության Ա և Բ կետերի միջև տեղաշարժը, որևէ միջոցառման գնալու հրապարակումը, բջջային հավելվածներում անձնական տվյալներ մուտքագրելը, առցանց գնումներ կատարելը կարող են մշտապես ապրել համացանցում և հասանելի լինել։ Եթե նույնիսկ ջնջենք մեզ կցված սարքից, հեռախոսից, միևնույն է՝ դրանք կպահպանվեն այն ծառայությունների պահոցներում և ամպային տիրույթներում, որոնցից օգտվել ենք։ Այդ պատճառով պետք է անընդհատ հետևել թվային հետքին։

Մշտադիտարկում և կարգավորում. որոնե՛ք ձեր անունը, օգտանունները և էլ. փոստի հասցեները համացանցում և սոցիալական ցանցերում: Գտե՛ք, թե որտեղ կա ձեր մասին տեղեկատվություն: Պարբերաբար վերանայե՛ք ձեր՝ սոցիալական ցանցերի հաշիվներում արած գրառումները, մեկնաբանությունները և լուսանկարները: Ջնջե՛ք կամ թաքցրե՛ք այն ամենը, որն ըստ ձեզ, կարող է լինել ամոթալի, անպատշաճ կամ այլևս անտեղի: Ջնջե՛ք այն կայքերի և ծառայությունների հաշիվները, որոնք այլևս չեք օգտագործում: Եթե դրանցում կցված են ձեր բանկային քարտերը կամ այլ փաստաթղթեր, դրանք նույնպես հեռացրե՛ք։