Առցանց և անցանց տիրույթներում մասնագիտական գործունեության խոչընդոտները մեծ իմաստով սպառնում են խոսքի և արտահայտման ազատությանը, ազդում բովանդակության և լրատվամիջոցների ֆինանսական ու տնտեսական հնարավորությունների վրա։ Անվտանգությունը խոչընդոտների կանխատեսումն է, դրանց կանխարգելումը փորձի, հմտությունների և դասընթացների միջոցով։ Խմբագրության/լրատվամիջոցի մշակյած կանոնները առցանց և անցանց անվտանգության վերաբերյալ մշտապես թարմացվող ցուցումներ են, որոնց նպատակն է ապահովել աշխատանքի, ստեղծագործելու, մարմնով և մտոք առույգ մնալու միջավայր և պայմաններ։

Խմբագրության կառուցվածքը ենթադրում է աշխատանքի մասնագիտացված բաժանում՝ ըստ ոլորտների։ Ճգնաժամերի, աղետների, զինված բախումների լուսաբանումը և՛ ընդհանուր, և՛ հատուկ հմտություններ է պահանջում։ Ապահովությունն արձագանքում է կոնկրետ թեմային, դեպքին ու իրադարձությանը։ Խմբագրությունը/լրատվամիջոցը կայացնում է հատուկ նախապատրաստական որոշումներ՝ կոնկրետ հանձնարարության կամ նախագծի կատարման ընթացքում վտանգներն ու վնասները չեզոքացնելու նպատակով։ Եթե, օրինակ, արտակարգ իրավիճակներում կողմնորոշումը վերաբերում է ընդհանուր անվտանգությանը, իր աշխատողների ապահովությունից բխող որոշումները արձագանքում են ծայրահեղ լարված քաղաքական բողոքներ լուսաբանելուն կամ չլուսաբանելուն։

Լրագրողի մասնավոր կյանքի գաղտնիությունը, խմբագրական խորհրդապահությունը, նենգաշորթումներին, սպառնալիքներին, խաբեություններին, առցանց և անցանց ծուղակներին դիմակայելը պահանջում են անհատական գործողություններ։ Պաշտպանության ուղղությունն ավելի շատ կապված է նախադեպերի, դրանց արագ արձագանքելու հմտությունների հետ, ներառում է առաջին օգնության, կողմնորոշման, ֆիզիկական անվտանգության, առցանց անվտանգության թարմացումներ։

Ուղեցույցը ներկայացնում է մեդիայում աշխատող մարդկանց անվտանգությանն, ապահովությանն ու պաշտպանությանն ուղղված գործողություններ երեք մակարդակներում։